OS SABORES DA MEDICIÑA AYURVEDA
O Ayurveda é unha medicina da Terra, unha medicina trimilenaria que permanece intacta e que pode ser aplicada eficazmente para corrixir os desequilibrios que se producen como consecuencia da vida actual: mala alimentación, estrés, contaminación...
O Ayurveda é unha medicina de prevención, paliación e rexuvenecemento. Case todas as súas pautas están encamiñadas ao coñecemento de nós mesmos e ao despregamento de prácticas enfocadas a manter a saúde, axustando o estilo de vida mediante hábitos, alimentos e accións concretas no día a día.
O Ayurveda axúdanos a reequilibrarnos, a volver ao natural, con terapias adaptadas a cada constitución persoal e, pouco a pouco, segundo nos imos reequilibrando, iremos recuperando o benestar, a enerxía e o equilibrio.
Un dos elementos básicos que utiliza o Ayurveda é o traballo cos alimentos, a través dos seus sabores. Cada sabor achega as súas propias calidades, e estas determinan o efecto que unha substancia vai producir no corpo ou na mente.
Na fisioloxía ayurvédica, o sabor coñécese como Rasa, que significa: “aquel que vai nutrir e expandirse por todos os tecidos do organismo”.
Existen 6 rasas, ou sabores, que, como todo na natureza, se compoñen de elementos e, en función deles, producirán benestar ou desequilibrio. Estes seis sabores son:
Doce, que achega os elementos terra e auga.Ácido, que achega os elementos lume e terra.Salgado, que achega os elementos auga e lume.Picante, que achega os elementos lume e aire.Amargo, que achega os elementos aire e éter.Astrinxente, que achega os elementos terra e aire.
Os sabores son moi importantes polos elementos que proporcionan. Se coñecemos a nosa constitución material, saberemos que elementos dominan en nós —Prakruti— e cales están en desequilibrio —Vikruti—, e poderemos inxerir alimentos que contrarresten os nosos desequilibrios e nos devolvan ao noso estado natural de saúde.
Por exemplo, se consumimos diariamente unha gran cantidade de substancias de sabor doce, achegaremos ao noso organismo moita terra e auga ou, dito doutra maneira, moita mucosidade, ao tempo que o arrefriamos. Como consecuencia disto teremos problemas cos nosos órganos dixestivos, relacionados co elemento terra, de modo que o noso estómago e o noso bazo-páncreas sufrirán; os nosos pulmóns encheranse de “mucus” e toxinas; a nosa mente volverase lenta e xeraremos unha actitude de indiferenza ante as cousas, de modo que perderemos capacidade de reacción, o noso pensamento crítico debilitarase e seremos manipulados con maior facilidade. Nós podemos ter unha idea aproximada do que nos senta ben ou mal, pero é recomendable acudir a un especialista, que posúe unha visión máis ampla das consecuencias.
Como información, cómpre ter presente que son numerosos os produtos de sabor doce que atopamos no mercado: bolaría, bebidas carbonatadas, comida preparada, zumes, medicamentos...
Non obstante, se o consumo de doce é moderado e adaptado á nosa constitución, xeraremos unha boa masa ósea, teremos un carácter cordial, unha mente tranquila e boa resistencia física.
Cómpre lembrar que os opostos, como vimos ao falar da constitución mental, anúlanse; é dicir, o concepto frío neutralízase co concepto calor, o concepto suave co duro, e así sucesivamente. Aquí radica un dos puntos que necesitamos coñecer para controlar os desequilibrios —a enfermidade—.
Imos ver algo máis sobre os sabores.
Doce
Achega terra e auga, por iso incrementa Kapha; engorda, por dicilo dunha maneira sinxela. A unha persoa Vata beneficiaralle, porque compensa a súa sequidade e lixeireza. Como é pesado e húmido, resultará nutritivo e tonificante, e hidratará.
Se o consumimos en exceso, prexudica o páncreas e o bazo, e pode levarnos á obesidade ou á diabetes. A nivel mental proporciónanos satisfacción na mente e axúdanos a loitar contra o estrés.
Ácido
O sabor ácido, por conter lume, vai ser un bo estimulante da dixestión, aumentando os líquidos que axudarán a hidratar os alimentos; isto será beneficioso para Vata. É importante para persoas con malas dixestións.
Se tomásemos moitos alimentos ou substancias ácidas, poderían aparecer problemas musculares, tales como debilidade, laxitude e alteracións na pel.
A nivel mental, pode facer que a persoa sexa excesivamente crítica e rabuda.
Salgado
Como contén auga e lume, beneficia as persoas con constitución Vata. Este sabor tamén aumentará a actividade dixestiva, desfacendo os alimentos e as graxas, e mellorando o sabor dos alimentos.
Se nos excedemos co salgado, podemos reter líquidos, aumentar a nosa tensión arterial e prexudicar a boa función dos riles, sentir náuseas e incluso vomitar. Con moito salgado o pelo encanece prematuramente e aparecerán tamén novas engurras na pel.
A nivel mental elimina o medo e aumenta o desexo de vivir, aínda que en exceso conduce á fachenda.
Picante
Como ten lume e aire, beneficiará a Kapha. Este sabor aumentará o apetito eficazmente e queimará as toxinas do organismo, quentará o corpo nos días de frío e mellorará a circulación xeral. É un sabor que despexa a mente e mellora o pensamento e a boa visión ante un asunto que resolver.
Se abusamos do picante, poden producirse contracturas musculares, irritación dixestiva e problemas de sequidade nos pulmóns. Mentalmente, o sabor picante xera intensas ganas de vivir grandes experiencias, achega ousadía e valentía sen medir demasiado as consecuencias, impaciencia e, moitas veces, irritabilidade e enfado.
Amargo
Consta de aire e éter, polo que aumenta Vata, pero reduce Pitta e Kapha. O sabor amargo elimina líquidos e seca a humidade excesiva do corpo. É un potente redutor e purificador, polo que é bo para desintoxicar o organismo. Reduce o azucre no sangue e depura o fígado. En exceso seca os tecidos e produce perda de peso.
A nivel mental estimula o crecemento espiritual, pero pode desestabilizar se hai demasiado.
Astrinxente
Consta de lume e aire. É bo para Kapha, pero incrementa Pitta. É o sabor máis quente, por iso é moi seco e un forte redutor do tecido —purificador—, sendo indicado para xente obesa con mala dixestión. O abuso deste sabor pode orixinar gases e formigo nas extremidades.
A nivel mental fainos máis extrovertidos e, en exceso, vólvenos apaixonados ou cheos de ira.
Unha nutrición correcta debe incluír os cinco sabores, pero insistindo máis naqueles cuxas calidades son opostas aos nosos desequilibrios. Por exemplo, unha persoa obesa —exceso de terra— deberá controlar o doce, que achega máis terra, e inclinarase cara a sabores astrinxentes ou amargos, que reducen tecido. Polo tanto, non debemos esquecer que cada alimento ten un sabor e que, en función del, actuará nun sentido ou noutro. O que é bo para unha persoa pode non selo para outra, se a súa constitución é diferente.
Que o sabor sexa a túa medicina...
CONTENIDOS
