Televisión rural: voz do territorio
PROXECTOS > TV RURAL
Senda Verde TV Rural, unha iniciativa da Fundación Galicia Verde, nace para ofrecer ao rural galego un espazo propio de comunicación, no que as persoas, as aldeas e as entidades locais poidan contar a súa realidade coa súa propia voz. Queremos dar visibilidade ás iniciativas que manteñen vivo o territorio, compartir coñecementos útiles e conservar e recuperar historias, oficios, tradicións e experiencias que forman parte do noso patrimonio colectivo.
Esta televisión en liña abordará cuestións relacionadas coa agricultura, o monte, a biodiversidade, a alimentación, a saúde, a cultura, o emprendemento, os servizos públicos e os problemas que condicionan a vida nas comarcas rurais. Non queremos falar do rural desde fóra, senón construír unha televisión feita desde o territorio, coa participación activa das súas xentes.
Para conseguilo, contamos coa colaboración de asociacións, comunidades de montes, cooperativas, centros educativos, profesionais e persoas particulares. A súa participación poderá concretarse na achega de documentais e outros materiais audiovisuais, na proposta de temas e experiencias, na recuperación da memoria local ou na incorporación a unha rede territorial de colaboración e seguimento da televisión.
O noso propósito é contribuír á construción dun rural galego informado, cohesionado e con capacidade real de decisión sobre o seu propio futuro. Senda Verde TV Rural quere ser unha ferramenta colectiva ao servizo das comunidades, baseada na participación, na independencia e no respecto ao traballo e aos coñecementos de quen colabora.
O rural ten moito que contar; agora precisa unha canle para facerse escoitar.
Unha televisión construída entre todos
Senda Verde TV Rural quere medrar coa participación das persoas e entidades comprometidas co futuro do rural galego. Estamos construíndo unha rede de colaboración que permita compartir información, experiencias, coñecementos e materiais audiovisuais procedentes das diferentes comarcas de Galicia.
Convidamos as asociacións, comunidades de montes, cooperativas, centros educativos e persoas interesadas a participar activamente neste proxecto, achegando documentais, propoñendo temas, colaborando na produción audiovisual ou incorporándose aos futuros comités de seguimento comarcais e xeral.
Cada nova colaboración axúdanos a construír unha televisión máis próxima, independente e representativa do rural galego.